Baloinese Archiv

Vo Rodersdorf bis Rieche,
Vo Dornach bis an Rhy,
Do faare grieni Drämmli,
Au gääli hets derby.
Die Drämmli sinn so frindlig,
Me macht e grooss Tamtam.
Drum hänn mir au kai Bahn so lieb
Wie unsers griene Dramm.
Drum hei mir au kai Bahn so lieb
Wie euses gääle Dramm.

Fir d Treui stoot d Faarb Blau,
(Das nimmt me aber nit so gnau.)
Mir froogen is uff alli Fäll:
Was bedytte Grien und Gääl?

Bi Grien, jä doo, do kasch no hoffe,
S sygg noonig wirgglig alles gloffe.
Aber d Faarb vom Niid isch halt au s Grien.
– Wenn grieni Drämmler niidisch dien…

Bim gääle Drämmli herrscht no Zucht
Und Oornig, und kai Yyfersucht.
Und ass me s au no laike ka,
Hets ringsum rooti Straiffe dra.

Es git wäge däm vyyl Drämmligschichte,
(Uff die vom -minu muesch verzichte…)
Aber sicher isch vom Laimedaal
Dr Wääg zem Bahnhof halt e Qual.

Drum fallt aim d Nummere Sibzää yy:
(Dasch friener s blaue Bäänli gsi.)
Das sott jetz d Lyt dr Stich uff faare –
Vom Laimedaal an Bahnhoof kaare.

Kuum stoot das uff dr Zyttigssytte,
Feen die Drämmler afoo stritte.
D BLT will mit Gääl duruff –
Und d BVB macht sofort Buff!

„Soo dyyri Investitioone
Miesse sich fir d Basler loone.
Und iiberhaupt syggs unverfroore:
S gieng Personaal esoo verloore!“

Die Gääle maine, das sygg glooge.
Dermit wurd s Bubblikum betrooge.
Und iiberhaupt, was die do welle,
Kasch nur em Fäärimaa verzelle.

So schleen si sich denn d Grinder yy
Und mergge nit emoll derby,
Bim Verbraite vo so Zoote,
Ass si voll ins Offside groote.

Uss Kupfer isch dr Kirchdurmspitz –
Au isch er gääl und grien e bitz.
S isch wie wenn er driiber lacht
Iiber die saubleed Margretheschlacht.

Dä Drämmligrieg isch halt wie Schach:
Dr Keenig schloot zerscht d Buure flach,
Und d Dame sticht denn d Ressli uuse.
Nur dr Wessels duet no pfuuse.

E soon e Schachspiel isch jo glatt:
Am Schluss vo däm sinn alli matt.
Irgendain verliert d Geduld,
Denn isch dr Schwarzi Peter tschuld!

Gly druff aabe isch es z spoot
Fir dr BVB-Verwaltigsroot.
Fir Eerligkait hänn die kai Gschpyyr –
Und Guede Rath isch wirgglig dyyr.

Ain nooch em andere fliegt jetz uuse.
Dr Grund derfir isch dails zem Gruuse.
Dr BLT spielt das in d Händ,
Die hänn die besseren Argumänt.

E Flexity-Drämmli oder e Tango?
Bis ains kunnt, kaa s eh no lang go:
„Drämmli, Drämmli, Drämmli, Drämmli.
Jä Drämmli, uf di warti nämmli…“

Uff d Stich-Verbindig muesch au warte,
Si wänn e Referändum starte:
Die ainte wänn e Tunnel baue,
Die and’re s Gäld nit so versaue.

S kääm schynts vor bim viele Liege,
Ass sich d Schyyne dien verbiege.
Jetz sott das Dramm – es isch zem Lache –
Dur s Gundeli en Umwääg mache.

Mir dien – statt im e Drämmli sitze
Oder bim Uffelaufe schwitze –
Halt mit em Flyer uffe flitze.
(Und d Schnäggli deerten au grad schitze..)

Drey Dääg speeter fallt dr Stich-Entschaid:

Und wie vermuetet ka me see:
Dr Drämmligrieg gwinnt d BLT!
S ney Stich-Wort fir die gääle Drämmli
Haisst jetz „Gääl, blyb suuber“ – nämmli…

Wenn uff e Minschterhiigel wottsch, muesch au e Stich uffelaufe. Derfir kasch denn deerte in aller Rue gääli und grieni Brachtstigg go bschaue (woorschynts au blaui), und zwoor vom Määntig znacht, em 10. Merze 2014, bis am Mittwuch demoorge, em 12. Merze. Gnau zer glyyche Zyt findet au d Waagen- und Reggwisyten-Usstellig bi dr Kasäärne statt. Deert faart wirgglig s Drämmli aane.

P.S.
Wenn de mee Stichhaltigs wottsch erfaare iiber unseri Glygge, denn lueg emool bi uns iine under www.baloinese75.ch. Do derfir muesch nit e Stich duruff.

Das finde d Buure z Aesch nit glatt,
Soo wurde d Kieh gly nimme satt.
Wenn d Politigg no wytter schlampt,
Sinn d Wiise noochhäär ganz vertrumpt.

Vo Scheenebuech bis Ammel
Het s doch e Huffe Rammel.
(Zwai dervo seesch uff dr Lampe
Bim „Haaselupfen“ ummetrumpe…)

Doch bivoor au nur ai Kueh verändet,
Wird die Strytterey beändet.
Mit Schwingete isch fertig Schluss:
Lieschdel wott kai Aidgenuss.

D Glygge isch sich zimmlig ainig
Und het die gäägedailig Mainig:
E soone Schwingerfescht wäär glaar
Fir alli Basler wunderbaar!

Mittlerwyyle heert me s munggle,
D Tattoo-Zuekumft liggt schyynts im Dunggle.
Drum erscht rächt, das Fescht muess aane!
Egaal wie si d Kasäärne plaane.

Mir leen is d Fraid do dra nit nä
Und wänn e glaine Vorgschmagg gä
Uff s Aidgenessisch Schwingerfescht.
Daas wäär fir uns jo s Allergreescht.

Schwingen isch, das isch kai Witz,
Dr Volkssport 1 do in dr Schwyyz.
Gnau daas wintsche mir scho lang:
D Summerfasnacht kunnt in Gang!

Als unsere Dambuurmajor
Stelle mir e Muuni vor.
Dasch dr Bryys fir dä wo gwinnt.
Denn hämmer grad zwai Muunigrind…

Dä Muni het e Ring dur d Naase,
Damit är nit ewägg ka raase.
Dr Wessels maint, das wär e Ding,
Statt Naase- gits e Veloring…

Dangg em Hampe faart gly s Drämmli
Ins Elsass zu de Waggis nämmli.
Well är will, ass au die mitfyyre,
Duet är e Kischten investiere.

Dr Baschi wämmer nit vergässe:
Är wott und duet e Brootwurscht ässe.
Zaale duet jo eh dr Staat.
Und denne hämmer dr Salaat.

Als Schwingerkeenig s nur ai Maa
– pardon: Eymaa – git,
Denn mee als aine gwinnt do nit.
Au d Eeredaame sinn in Form,
Wie d Eva – nooch dr Stierreform…

Dr Morin het jetz nyt mee z mälde.
(Bi ihm isch das scho ender sälte.)
Bivor är goot als Arzt ans Wärgg
Griesst er als Echo no vom Haasebärg…

E Faaneschwinger lauft au mit.
No besser schwinge ka me nit.
Und was me glaar ka see:
S isch äänlig bi dr SVP…

S Spiel bi uns, das sinn die Beese,
Vom Image ka me sich nimm leese.
Mit Schwingerhoosen ussstaffiert
Wird dängg s Volgg symbolisiert.

Si stoosse, risse, zien und schupfe,
Dien an de Hoosen umme lupfe.
Und z allerletscht – dasch glaub dr Sinn –
Alli voll vo Säägmääl sinn…

Denn putzt me sich am Brunne suuber
Und faart haime schnäll mit Uber.
Und schnäll zrugg – s goot nimmi lang,
Jetz kunnts scho zem näggschte Gang.

E „Hüfter“ git s, e „Wyyberhogge“.
Scho liggsch im Säägmääl, dasch nit glooge.
E „Brienzer“ gfolggt vomene „Gamme“ –
Dr Forrer Noldi miech dä amme…

Si haisse Glarner Matthi, Sempach Matthi,
Wenger Kili (s git no meh so Glatti).
Soo Schwingerkeenig sinn Idol,
Wie unsere „Karli noone Goal“.

Und s Fescht ringsum isch riisegrooss.
Glyych wie d Fasnacht – ganz famoos!
Esoo drey Dääg sinn wirgglig glunge:
Am Schluss hesch s Gfyyl, syggsch sälber gschwunge…

Per Saldo isch s doch wie im Lääbe:
Als Verlierer liggsch dernääbe.
Drum isch dä Zeedel schnäll verzellt
Und kai Verlierer, aaber gschtellt!

Vom Määntig znacht, em 6. Merze, bis am Mittwuch demoorge, em 8. Merze, kasch dini Schwingerhoose uff em Minschterhiigel um die gschtellte Laddäärne ummeschwinge. Gnau zer glyyche Zyt findet au dr Waagen- und Reggwisyte-Gang bi dr Kasäärne statt. Wenn die no stoot…

P.S. Wenn de mee wottsch erfaare iiber uns Gschwungeni, denn lueg emool bi uns iinen under www.baloinese75.ch.

Dail 1: Rings um dr Zolli

S Ozeanium: dasch immer no vom Disch:
Mir wänn doo numme glaini Fisch.
Unser Sujet mit de Gwalle
Isch däre Siich zem Opfer gfalle.

Au z Basel git s e Be-A-Ge:
Basel Action Group, dasch s Comité!
Die schepfe nit grad uss em Volle.
Und wisse lang nit, was sy solle…

Soll me dissjoor Fasnacht mache?
Darf men ooni Masgge lache?
Ka me wytter drummlen iebe?
Soll me s äggscht uff s näggscht Joor schiebe?

Es isch doch irgendwie scho bitter:
Mir sinn syt zwai Joor kai bitz wytter.
Soll y – joo – e Zeedel schryybe?
Oder: nai – y loss es lieber blyybe?

Soll y iiber dr Bärset schimpfe?
Soll y mi lieber nomoll impfe?
Soll y mit mim Kind in Zolli?
Ich froog mi generell: Was soll y?

Lyycht het me s nit, doch het s aim lyycht.
Grad wenn e Virus umme schlyycht.
Sott s mi nää, denn froog y: Soll y
Ebbis losse fir dr Zolli?

Falls es dr Zolli denn no git…
Scho froog y mi: Jää, soll y nit?

Zerscht s alt Huus vo den Antilope,
Denn s ney fir d Veegel us de Droope:
Soo vyyl Gäld, es wäär e Sääge,
S kääm em Zolli sicher glääge.

Dr Zolliaff, dä stuunt nit schlächt:
Bim e Hoor griegt är meh Rächt.
Dr Dierschutz maint, sy Maass syg voll,
Und frogt sich, was dä Zolli soll.

Mit Massge kasch, so will s mer schyyne,
Ins Affehuus vom Zolli iine.
Isch das Huus denn grammlet voll,
No frooge d Affe, was das soll.

Dr Lai brillt laider nimm am Oobe.
Är isch im Katzehimmel oobe.
Ooni ihn isch s nimm dr Hit:
Soll y in Zolli – oder nit?

Dail 2: Rings um Basel

Under dr alte Dante stäggt e Maa.
Fraue zien e Waggisgoschdym aa.
Fir d Zircher Schieler*inne wäär das schlimm:
Eb Maitli oder Bueb? Die wisse s nimm!

Au d Frau Fasnacht waiss nit gnau: Me too?
Dr Cash singt vom e „Boy named Sue“.
Und d Basler Zinft hänn gar kai Waal:
Als Zunftmitglied sygsch gschlächtsneytraal…

Ich sälber bi doch zimmlig froo:
Umbaue ha mi noonig loo…

Dr Ängelbärger – dr Lukas main y –
Sait, ebbs Fasnacht git. Bi „Joo“  git s aini!
Gäägen ihn heeg ich kai Groll:
Ich wääl dä woorschyynts doch nomoll.

Im Regierigsroot sitzt ney d Frau Käller.
Mit em Baue goot s halt glyych nit schnäller.
Und Baim, die findsch fascht nur im Zolli.
– Ich gang zu Greenpeace! – Jä mainsch soll y?

D Stephie Eymann: au sii isch ney,
Si laitet bi uns d Bollizey.
Wott wisse, wär im Stadion sitzt.
Drum het si mi hitt zwaimool blitzt…

Ass d Schwyzer uss em Raame falle,
Duet z Brissel ganz nit alle gfalle.
Dr Beat Jans hätt zwoor Int’rässe:
Klimahauptstadt? Kasch jetz vergässe!

Z Basel an mim Rhy
Baut flissig d Pharmazie.
Well s jetz nit weniger Styyre git,
Git s glaub der dritti Durm au nit.

Z Basel isch es langsam Moode:
D Auti versänggt men undere Boode.
Und s Drämmli losst sich ganz vyyl Zyt.
Jää, soll y laufe oder nit?

Fir d Art wird s z Basel wirgligg hart,
Ganz halt noo dr Basler Art.
Uff Paris go ziigle? Do kumm y mit!
Toll! Ewägg vo doo. – Oder soll y nit?

Dail 3: Ringsumme und iiberhaupt

„Da steh’ ich nun, ich armer Tor,
Und bin so klug als wie zuvor.“
Scho dr Goethe het – als Dichter ganz e tolle –
Nimm gnau gwisst, was mer jetz solle.

Henusodenn: jetz leen mer s blyybe
Und leen is wien e Gwalle dryybe.
Ich main dängg sälli uss em Zolli,
Wo halt au nie waiss, was soll y?

Mir sinn ainewääg und unverdrosse
No allewyyl ganz fescht entschlosse…

Vom Mäntig znacht, em 7. Merze, bis am Mittwuch demoorge, em 9. Merze, isch
uff em Minschterhiigel irgend en Art vo Ladäärnenusstellig. Ganz gnau waiss es
numme s BAG, oder au nit…
P.S.
Wenn de mee wottsch erfaare iiber unseren entschlossene Unwissensstand,
denn kasch uff www.baloinese75.ch go luege.

Selfies sinn jo nit so ney:
Mir dängge doo an Dorian Gray.
Und an „Spieglein Spieglein an der Wand,
Wäär isch die Scheenscht im ganze Land?“

E Maitli uff em Guetknächt-Brunne
Drääit sich mit eme Spiegel umme.
Hitt käämi deert, me ka s fascht aane,
E Smartphone statt em Spiegel aane.

E Sälbschtporträt, das isch e „Selfie“.
Und wenn de bsoffe bisch haisst s „Drelfie“.
E ganz wiescht Selfie haisst schynts „Nudie.“
Deert zaigt men allne Lyt si Fudi…

Ebb z Basel, z Baade, ebb bim Bund,
Iiberall goot s aifach rund. Iiberall goot s kunterbunt.
Me gnippst sich self as „Nackedei“
Und schiggt das denn dr Kolleegin hai.

Dr Selfieman mit Namme Müller
Geri maint, daas sygg e Knüller.
Är het – e Root kunnt doo vergääbe –
Dr greeschti Saich abgloo im Lääbe.

Scho s letscht Joor hämmer driiber brichtet
Wie me mit Selfies Jobs vernichtet.
Falls de daas nimm wisse settisch,
Bisch in gueter Gsellschaft – wettisch?1)

1) Mer hänn das brichtet – jä, s isch woor –
In unserem Zeedel s vorder Joor!

Jä sogaar in Hollywood
Pouschte si sich fudiblutt.
Dernoode dien si driiber motze.
So vyyl Dummhait isch zem … Dervooseggle.2)

2) Bevoor s Comité kunnt mit ere Korrektur –
So wyt simmer scho mit Sälbschtzensuur!

Bi Prominänz im Allgemaine:
E Papparazzo bruucht s e kaine.
Fir die git s gar nyt mee zem Lache,
Well d Promis sälber Selfies mache!

Drifft me dr Breel aa uff dr Strooss,
Goot scho s Gerangel richtig los:
Das isch jo wirgglig soone Siesse,
S muess jeedi grad e Selfie schiesse!

Denn git s au so Schopfmakake,
Wo de Lyt iir Smartphone pagge
Und sich denn au dien sälber linse –
Ab dääne Selfies muess me grinse!

So Selfies syygen insgesamt
No gfäärlig, warnt is s Xundhaitsamt.
Will: d Kopflyys pagge s grad bim Schopf
Und wäggsle gärn vo Kopf ze Kopf…

Vom Bundesroot git s all Joor amme
E Gruppefotteli mit Dame.
Ab näggschtem Joor – hänn mir erfaare –
Git s nur no Grelfies3) – so kennt me spaare!

3) E „Grelfie“ isch dängg e Gruppe-Selfie!

Schynts findes sogaar d Muslim glatt:
E Selfie uff em Ararat!
In Mekka unde goots denn wytter.
Drotz Koran: lutt däm syg s schytter!

Sinn dini Ärm e bitzli z kurz,
Denn git s jo jetz dr neyschti Furz:
Stäggsch di Phone an e Stägge dra –
Und scho kasch au e Grelfie ha!

Und in dr letscht Museumsnacht
Hänn si Selfies „Deluxe“ gmacht!
Mir froogen is, was hätt das selle?
Das gheert doch nit zem Kulturelle!

Däm Ganze sait me Selfieness.
Machsch mit, kunnsch sälber gly in Stress.
Drum leen mer s lieber bliebe Drum leen mr s jete (Chatte?) lieber bliibe
Und dien dä Zeedel fertig schriebe.

Per Saldo bringe d Selfies nyt
Und schaade numme no de Lyt.
Me reedet kuum mee mitenand,
Het lieber s Smartphone schnäll zer Hand…

Mir derfir dien jubiliere,
Noo 40 Joor uns sälber fiire.
– Wie het s Orakel gsait vo Delphi?
E Debakel wird daas mit däm Selfie!

D Wooret isch halt grauehaft
Und unsere Zuug soo pfauehaft.
D Frau Fasnacht herself duet dirigiere,
Fir is in Fasnachtshimmel z(sel)fiere.

Doch wie me s Blatt au wändet,
Dä Zeedel im Selfiasko ändet:
Drum verdufte mir jetz glyy:
E Jubelselfie muess scho si!

Vom Määntig znacht, em 23. Hornig, bis am Mittwuch demoorge, em 25. Hornig, kasch uff em Minschterhiigel Selfies vo dir und de scheenschte Ladäärne gnippse. Gnau zer glyyche Zyt findet au d Waagen- und Reggwisyten-Usselfig bi dr Kasäärne statt.

P.S.
Wenn de mee wottsch erfaare iiber unseri Selfiemade-Glygge, denn lueg emool bi uns iinen under www.baloinese75.ch. Do derfir muesch di halt yourself yylogge. Losst di aifach nit abselfiere.

Zimmlig gnau vor fuffzig Joor
Hänn so Lyt mit lange Hoor
Sich gsuecht e neyi Gsellschaftsform –
Usserhalb vo jeedere Norm.

Si hänn dr Staat nimm akzeptiert,
Hänn jeedi Droogen ussprobiert,
Hänn wilde Sound gloost lutt,
Sinn ummegloffe fidleblutt…

Si verrysse d Konsumäntehaltig.
Kriegerlis, das stinggt ‘ne gwaltig.
Vater sy isch au nit schwäär:
Me erzieht anti-autoritäär.

Come on Baby light my Fire!
Dangg Janis, Jimi wirsch no higher.
Die Zwai lääbe jo hit nimm.
Aber unvergässe blyybe d Stimm!

Gläbbt hänn d Hippie in Kommune.
Do driiber kasch hit nur no stuune.
Freyi Liebi – kaini Zwäng:
Si seen das alles nit so äng…

Liebi, Friede, drummle, pfyffe –
E mängge ka das nit begryffe
Und froggt sich: Was, wieso, worum?
Isch d Fasnacht en Art Hippietum?

Drei Daag simmer denn in Trance
Und leen em Alldaag gar kai Chance.
Jä, me muess es aifach see:
E Drooge, meh als LSD!

Drei Daag Hippie simmer zämme.
Und wemmer denn no ain zwai stämme
Schwääbe mir uff Wolgge Siibe:
Dr Allldaag ka dehaime blyybe!

S wird au dr Staat fyyn kritisiert
Und meegligscht gscheyt no intrigiert.
Drei Daag happy, beschti Luune.
Und Glygge isch drei Daag d Kommune…

Z Basel hets in dr Regierig
Au so Hippie ooni Fierig.
Si faare maischt mit Velo umme
Und d Autifaarer sinn die Dumme.

Mit em Dreierdramm noch St. Louis,
Au dr Wessels Hampe isch derby.
De Basler Baizer duet das weh:
Si hänn scho s Fyyr im Elsass gsee…

Dr Frau Herzog iiri Garderoobe
Wurde d Hippie woorschynts loobe.
Aber drotz däm Flowerpower
Wird d Regierig nit vyll schlauer…

Au wenn d Hippie ‘s nit hänn welle:
Zer Fasnacht gits halt Parallele!
Bunti Gossdym, dr Sound scheen schreeg.
Und jeeden isch dr bescht Kolleeg.

Bi uns hets Lyt uss x-Natioone.
Zwoor dien mer dängg nit zämme woone,
Doch an dr Fasnacht simmer „jippie!“
Alli zämme drei Daag Hippie!

Wie d Hare Krishnas uss em Hair
Kunnt e mängge Zuug derhäär.
Dr Kopf vom e Dambuurmajoor:
S kunnt aim wie im Pilzrusch voor.

Missständ mache aim ganz muff:
Daas zaige d Schnitzelbänggler uff.
Am Mäntig bim Ladäärneschyyn
Hesch s Gfiel, de syggsch uff Mescalin…

Fascht wie in eren Ekstaase
Seet me Waggis umme raase.
Ai Duurenand, und doch kai Buff.
Als Hippie steen mir halt do druff!

Drei Daag kasch di Grind verlifte
Und säälig ammen ab go drifte.
Hippiemässig ganz befreyt:
Bis denn aine „Yystoo!!!“ schreyt…

Uss alle Schichte kemme d Lyt.
(Normaalerwyys gits au kai Stritt…)
D Reegle sinn zwoor zimmlig sträng,
Mir seen das aber nit so äng…

Uff s Comité isch glyych Verlass:
Die schänggen is e Fasnachtsgass!
Und das schynts nit uss Aigenutz –
Wie bi de Hippie gopffriedstutz!

Sogar d UNESCO findet s Kultuur –
Nai, mee no: Wältkultuur!
Isch das jetz nit e bitz banaal?
Em e Hippie wär das sch…egaal!

Jä, mir wänn uns nit biglaage
Und zletschemänd no ebbis saage:
Uff Goa raise muess me nit:
Wells z Basel drei Daag Woodstogg git!

Vom Määntig znacht, em 19. Hoornig, bis am Mittwuch demoorge, em 21. Hoornig,
kasch uff em Minschterhiigel im Faarberusch vo de Laddäärne schwääbe.
Gnau zer glyyche Zyt findet au dr Waagen- und Reggwisyte-Trip bi dr Kasäärne
statt.

P.S.
Wenn de mee wottsch erfaare iiber unseri Kommune, denn zieh emoll ain iinen
under www.baloinese75.ch.

Hesch uf em Kopf zvyll Raschta-Logge?
Findsch, Reggae-Muusig sygg dr Hit?
Wottsch mit dr Band go d Biini rogge?
Denn gfallt das zwai, drey Naase nit.

Si maine halt, in däm Lokaal
Fyyle si sich nit rächt wool.
Kultuur aa aigne sygg fataal.
(Die hänn woorschyynts scho ain im Goal…)

Uf jeede Fall – jetz muesch guet loose –
Wird dernoo dr Stroom abgstellt.
So goot s Konzärt komplett in d Hoose.
Und Rum het deert e kain me bstellt…

Dä Vorfall git aim wirgglig z dängge.
Wo aane fiert das alles no?
So kasch d Kultuur jo grad versängge,
Mir kenne das halt nit verstoo.

«Indianer» spiile sott me nimme,
Das verletzt vo dääne d Gfyyl.
Dr Winnetou, und das isch s Schlimme,
Wird zem «Cancel Culture»-Zyyl.

«Indianer» isch schlicht nimm korräggt,
Well s «Ami-Uryywooner” haisst.
Wäär “Eskimo” sait, isch au suspäggt,
Falls me zue den “Inuit” raist…

Dr Othello us em Shakespeare-Drama
Het si Pflicht jo lang scho doo.
Au dr Siddi Abdel Assa vo el Hama
Basst nimm in d Zyt und muess drum go.

Hamburger daarf me gar nimm ässe.
Au Wienerli sinn komplett out.
Dr Russisch Salaat muesch eh vergässe,
Dää hänn die fir uns ganz versaut.

Ziircher Witz sottsch au nimm mache,
Ab dääne lacht me eh jo nie.
Au iiber d Schwoobe daarfsch nimm lache. –
Do hämmer scho no fascht mee Mieh.

D Gschlächterfroog blybbt ammen offe:
Isch d Frau Fasnacht nit e Maa?
Und im Elsass sinn hit d Lyt bedroffe,
Ziesch e Waggisgoschdym aa…

D Fasnacht grootet blangg ins Graue,
Me deerf kai faarbig Sujet haa.
Sunscht kenntsch dr Subventioon verbaue. –
D Sälbschtzensuur, so foot si aa.

Das isch dr Doot vom Narredryybe,
Me waiss gar nimm, was isch no rächt?
Am Beschte duesch dehaime blyybe,
Denn was de machsch, s kunnt sicher schlächt.

Arabi, Whisky kasch nimm pfyffe,
Die kemmen us ere Fremdkultuur. –
Mir hänn das ämmel nit begryffe:
Scho haisst s, syggsch z alt, syggsch z wyss und stuur.

D Mediewält kennt kai Erbarme:
Si ziet iiber alles, iiber jeede häär.
So duet d Kultuurwält ganz verarme,
Hesch au du im Kopf e Schäär…?

Kultuure kennt me doch vermische?
S goot emänd um Akzeptanz.
Vo doo und deert e bitzli fische:
So leersch nit nur e Dail, leersch s Ganz…

Reggae kennt me wieder loose,
Blues wäär au in Basel glatt,
Sansculottes geen denn als Hoose.
Kurz gsait: S wäär e tolli Stadt.

Wäär nyt woggt, ka au nit gwinne,
Und blybbt emänd en arme Dropf.
Me muess halt schon e bitzli spinne,
Denn bruucht men au kai Schäär im Kopf!

An d Fasnacht kasch mit Waggisnaase
Und ooni Stress an Cortège go.
De daarfsch in Basel ummeraase
Und d Schäär, die kasch dehaime lo.

Vom Mäntig znacht, em 27. Hoornig, bis am Mittwuch demoorge, em 1. Merze, kasch uff em Minschterhiigel erfaare, was drotz dääne Schäärereye no iibrig blyyben isch. Zer glyyche Zyt herrscht bi dr Kasäärne no Zucht und Oornig.

P.S.
Wenn de mee wottsch wisse vo unserem kulturelle Schääreschnitt, denn logg di yy uff www.baloinese75.ch.