Aggtuell

Sujet: Quallo vadis? Oder: Mir leen is dryybe.

Dr Joachim, dä Ringelnatz,
Het uff däm Zeedel au si Blatz.
Mir hänn e Värsli von em gsichtet,
Won är vo Ilp und Gwalle brichtet:

„D Dante Gwalle schwimmt an Strand.
Es liebt si schyynts en Elifant.
Und dä Ilp haisst Hildebrand.
Är wartet uf si jetz am Strand
Mit eme Maijen in dr Hand.
Dä git är iire ganz galant
Und bittet grad um iiri Hand.
So knipfe si denn s Eheband…“

Si hänn denn zämme Hochzyt gfyyrt:
Dr Ilp isch jetz gwallifisziert!

In unserem Zolli dien schyynts d Gwalle
Vyyle Lyt ganz bsunders gfalle.
Drum he me blaant fir all die Vyycher
E Neybau. S miech ganz Basel ryycher.

Fascht ganz isch s Gäld versproche – cool!
(Em e gschänggte Gaul luegsch nit ins Muul.)
Aber s goot nit lang, wird regglamiert,
Ebb sich dä Neybau au rentiert?

Speziell isch die Franz Wäber Stiftig
Gääge s Ozeanium giftig.
Si findet halt das Bauprojäggt
Vo Aafang aa scho ganz suschpäggt.

Vor allem syyge d Troopefisch
Bis si do sinn nimm ganz frisch.
Au de Basler Zolli-Gwalle
Däät soon e Zyyglete nit gfalle.
De Gwalle gfallt s kalt Wasser nit.
Warms Wasser isch fir si dr Hit!
Dr Klimawandel, s duet is laid,
Isch fir d Gwalle halt e Fraid.
Es bruuchi vyyl z vyyl Energie.
Drum lossi me s Projäggt doch sy.

Me het s em Volgg nit rächt verclickt:
E „Meerhait“ het s dr Bach ab gschiggt…

Derby – au wenn das nit hesch welle –
Git s z Basel Gwalle-Parallelle:

D Bollitig vo Basel bis Sang Galle
Het s gaischtig Niveau vo so Gwalle.
Vo dr Streemig dien – isch s nit eso? –
Bollitiger sich dryybe lo.
Die leen sich go, waiss jeedes Kind,
Wie d Gwalle aifach mit em Wind.

So kemme d Gwalle mit em Drägg.
Und geen denn aifach nimm ewägg.
Si spritze Gift ganz gwalltig. –
Das isch au e Basler Haltig…

Wie kennt vo däm au s Stadtbild gwinne?
Statt Basilisgge Gwallen uff de Brinne?
Und s Drämmli isch – ass Gott erbarm –
Langsam wien e Gwalleschwarm…

… ganz wie bim Rhyschwumm: ooni Flosse
Duet d Streemig di fyyn dryybe losse.
Me seet do glaar dangg Wiggelfisch
Wär z Basel nit ganz gwigglet isch.

Mir froogen is: „Jä – Quallo vadis?“
Wo aane denn? S isch niene gratis.
Ins Hysteerische Museum? – Schlimm! –
Deert findsch se denn halt woorschyynts nimm.
Derfir isch dr Diräggder do.
(Das macht is au nit wirgglig froo.)
Oder dien mer si in Zirisee?
Deert mache si de Zircher weh!
Und sinn no blau, aber nimme rot.
Mutiert in Wyssblau – wie s so goot…

Wottsch z Basel ebbis Neys gestalte,
Blybbts zleschtemänd jo glyych bim Alte.
Stillstand, Stuurhait, und kai Muet
Sinn fir d Gwallidäät nit guet.

Als Bundesroot, waiss s Gärschter Trudy,
Hämmer z letscht dr Hampe Tschudi.
Das deent wien e Määrli hitt,
Wo s aigedlig scho lang nimm git.
Au doo duet z Basel nyt me go.
Me losst s drum gärn bim Status quo.

Drum wurd s is alle zämme gfalle
S hätt s Basler Wappe ney e Gwalle.
Au wenn das wurd, s isch nit zem Spasse,
Wien e Fuscht uf d Auge basse.

„Wie schryybt me Gwalle?“ wottsch no wisse:
Das Wort im Baseldytsch muesch misse.
In kaim Weerterbuech kasch „Gwalle“ finde.
(Au nit bim Suter wytter hinde.)

So isch das Sujet nit reell,
Ender nämmlig virtuell.
Muesch nyt dängge, seesch guet us.
Und us em Sujet kunnt eh kain druss…
Quallo vadis? Die Froog ka blyybe. –
Mir leen is lieber no bitz dryybe…

Vom Määntig znacht, em 2. Merze, bis am Mittwuch demoorge, em 4. Merze, kasch uff em Minschterhiigel au en Art vo Ozeanium go bsueche. Meerfarbig und ganz CO2-neutraal. Zer glyyche Zyt sinn au d Wäägen- und d Reggwisytten ussgstellt bi dr Kasäärne. Wäär dr Waal het, het au d Gwaalle…

P.S.
Wenn de mee wottsch erfaare iiber unser Glyggenagwaarium, denn mach doch e virtuelle Dauchgang uf www.baloinese75.ch.

Heb di Fescht! – D Basler Fasnacht isch abgseit.

do gits Informatione vom Kanton:

https://www.coronavirus.bs.ch/nm/2020-coronavirus-basler-fasnacht-findet-nicht-statt-rr.html

Was Wie Wenn Wo
Was Wie Wenn Wo

Bâloinese 75
4056 Basel

Postadresse
c/o Marcel Trachsel, Habsmattweg 1, 4153 Reinach

Kontakt
Felix Glaser catglaser@vtxmail.ch
Webmaster
Nicole Trachsel nicole.trachsel@int-ext.com

Bankverbindung
PostFinance
Ktn.-Nr. 40-29310-2

Pin It on Pinterest

Share This