Aggtuell

Im Nyynzääfinfesiebzig grindet. –
Fuffzig Joor, das isch scho digg.
E soon e langi Zyt verbindet:
Drum fyyle mir is keeniglig!

Keeniglig – au in uns inne –
Isch s Gfyyl wääred de scheenschte Dääg:
So wien e Keenig syy und sinne,
Und wie Naare frei und zwääg.

Als Keenig kennt men us de Määrli
En alte Maa mit wissem Baart.
Dr Keenig als e glatte Käärli
Git s niene me in däären Art.

S git laider vyyl z vyyl Autograate
In dr ganze Wält efang.
Nit nur im Oschte het s so Staate. –
S macht aim langsam Angscht und Bang.

Wie Keenige dien die regiere,
S Volgg tscheggt s nit und isch halb blind.
Wo aane numme wird das fiere?
Es bloost e zimmlig rächte Wind.

«D Kunde syge Keenig immer»
Haisst inere soon e Reedensart.
D Wooret isch derby vyyl schlimmer,
Wel me mit Kunde Schlitte faart…

E jeede maint hitt, är syg Keenig,
Und die Andere nyt wäärt.
Derbyy jo wäär dr Keenig weenig,
Wenn kai Hoofnaar ihm sy Wält ergläärt.

Wo s Keenig git, do het s au Naare,
Ooni Naar ka kaine sy.
Dä faart em Keenig denn an Kaare.
Und fyylt sich keeniglig derby…

Scho die groosse Humanischte
– vor allem halt dr Baschi Brant –
Dien bim Staat gärn uusemischte.
Sy Naareschiff isch wältbekannt:

«Eyn arm Kindt, das doch Wysheyt hat,
Ist besser vyl in syner Stadt
Als eyn Künig, eyn alter Narr,
Der nit sorgt für künftig Jahr.»

«Ja würt all Gschrifft und Lehr veracht,
Die gantz Welt lebt in finstrer Nacht
Und duot in Sünden blint verharren.
All Strassen, Gassen, sindt voll Narren.»

Als Bischbiil nämme mer d Regierig,
Wo keeniglig regiere duet.
Doch die ganz Bollitisierig
Kääm ooni Hoofstaat gar nit guet.
(– Und mit em Hoofstaat: Isch s denn guet?)

S git keenigligi Aigeschafte:
Erfaarig, Waishait, glasse sy.
E Duurenand kasch kains vergraffte,
Denn isch s mit Keenig sy verby.

So äänlig ammen isch s im Lääbe:
Keenig sy isch mänggmool schwäär.
Liggsch du au emoll dernääbe?
Sinn dini Batterie läär?

Jetz bruuchts Grafft und Understitzig,
Und drum wird dir au bletzlig glaar:
S bruucht kai keenigligi Sitzig.
S bruucht aifach nur e Naar!

Nummen isch das ganz nit aifach. –
Sunscht wäär s jo ämmel gar kai Sach.

Am säggste Jänner stäggt im Kueche
E Keenig dinn, wo alli wänn.
Dä Keenig aber muesch zerscht sueche,
Wel nit alli Stigg ain hänn…

Dr ganz Daag keeniglig erlääbe
Isch am Dreikeenigsdaag der Sinn.
E Naar suechsch deerte ganz vergääbe.
Die stägge nie in eme Kuechen in.

Dr Oobrigkait dr Spiegel zaige. –
Dasch vo dr Fasnacht jo dr Zwägg.
Au em Hoofnaar isch das aige:
Är wischt am Hoof dr Drägg ewägg ewägg…

S git e Marsch em e Keenig z Eere.
Mir kenne dä nit, zem guete Gligg!
Derfiir dien mir dr Hoofnaar leere.
Denn dä deent wirgglig keeniglig…

«Syg wie de wottsch» haisst s Motto
Vo dr Fasnacht in däm Joor.
Und wien e Säggser-Gwinn im Lotto:
Keeniglig isch s Naaresy! – Gäll, dasch woor!

Vom Mäntig znacht, em 10. Merze, bis am Mittwuch demoorge, em 12. Merze,
kasch uff em Minschterhiigel die keeniglig Hoofnaarespiegelusstellig erlääbe.
Zer glyyche Zyt findet bi dr Kasäärne die keeniglig Kutschenusstellig statt.
P.S.
Wenn au wottsch keenigligi Gfyyl entwiggle, denn kasch das uf www.baloinese75.ch