Aggtuell

Proloog (gsunge):

«Alle Vögel sind schon weg,
Alle Vögel, alle!
Gar kein Singen, Musiziern,
Pfeifen, Zwitschern, Tiriliern!
Nur Krähen wollen einmarschiern,
Ohne Sang und Schalle.»

Wäär hätt s dänggt, ass settig Raabe
Emoll «Corvus delicti» sinn?
Im Staatsarchiv sinn mir go graabe:
Gfunde hämmer nyt deert inn…

Denn Graaie sinn bi uns e Bloog.
– Si sitze bald uff jeedem Baum. –
Und wärde langsam ooni Froog
Ganz zem e bees verschissene Draum.

D Singveegel heert me laider nimm.
Numme Gwaagge gwaagge. – zimmlig trischt!
Und verrisse dien si, jä, ganz schlimm,
D Bebbisegg voll Bebbimischt.

Wie kennt me die Miseere leese?
Do git s Blään, die sinn nit ghaim.
D Stadt Basel het derfir e These:
Si hoole d Näschter vo de Baim!

Derby hänn jo die schwarze Graaie
Symbolisch gsee dieffi Bedytig:
Si dien schynts immer Ungligg saaie.–
Nit numme ammene schwarze Frytig…

E Gwaagg isch schynts au zimmlig gscheit,
Lutt «la Fontaine» sogaar no schlau.
Doch wenn em dr Kääs denn aabegheit:
Isch daas dr Fuggs nit ebben au?

Denn s gilt im alte Griecheland,
– Au sunscht uff dr Wält fascht iiberall –
Me waiss es mit e bitz Verstand:
S kunnt sicher Hoochmuet vor em Fall!

S wird brichtet vo so vyyle Raabe
In de Gschichte vo dausigundeiner Nacht:
Si haige wundersaami Goobe,
Doch syyge au voll Niidertracht…

Die Graaie hänn halt au zwai Syte,
Gnau glyych, hejoo, wie jeede Mensch.
Dasch esoo syt lange Zyte.
Wie de daas vom Mensch au kennsch.

Dr Huggebain vom Wilhelm Busch
Bringt äxtraa alles duurenand.
Uff em Disch macht är e Gnuusch.–
Drum baumelet är zer Stroof am Rand!

«Booshait syg si Hauptpläsier,»
Het vorhäär d Dante Lotte gsait.
«Drum», maint die Dante, «hängt er hier!» –
Wäär z vyyl will, het bald ganz versait…

S git persee wie Sand am Meer
So Bischbiil in dr Bollitigg!
Fir das hänn mir aifach kai Gheer.
Und Narzissmus bricht aim s Gnigg.

S het laider vyyl z vyyl Autograate
In dr ganze Wält efang.
Nit nur im Oschte git s so Staate. –
S macht aim wiirgglig Angscht und Bang.

Die glaini Häx het au e Grabb,
Wo sii ganz schlau beroote duet.
Si sait denn do derzue ganz gnabb:
«Abraxas, di Ydee isch guet.»

Är maint nämmlig zem Comité:
«Die glaini Häx, wäär mi Ydee,
Kennt ych – hejoo dernoo persee –
Uff dr Blaggedde pfyffe gsee!.»

Mir hänn d Fasnacht no, zem Gligg,
Gseen drum raabeschwarz nit numme.
An dr Fasnacht het s, dasch digg,
Au dissjoor vyyli Faarben umme.

Uff d Graaien in dr Stadt bezooge,
Fäält glaar, ganz wie me dytlig gseet,
Und das isch kai bitzli glooge,
E groobe Schuss Diväärsideet!

Epiloog (nit gsunge, ender gwaaggt):

Raabeschwarz gseen mir nit ganz. –
S git e Liechtbligg doo und deert.
Au wenn is bi däm Graaiedanz
Mänggmool halt das Gwaagge steert…

Vom Mäntig znacht, em 23. Hoornig, bis am Mittwuch demoorge, em 25. Hoornig,
kasch uff em Minschterhiigel die faarbigscht Voogelusstellig ever gsee. Zer glyyche
Zyt findet bi dr Kasäärne e Volièrenusstellig statt.
P.S.
Wenn au wottsch keenigligi Gfyyl entwiggle, denn kasch das uf www.baloinese75.ch