Baloinese Archiv

2016 Sujet: Mir bschyssen au

Me kennt s vom Pinocchio syner Gschicht:
Bim Liege waggst d Naase aim im Gsicht.
Wäär daas in Wirggligkait dr Fall,
Hätts langi Naasen iberall!

Mir alli zämme, s isch kai Witz,
Bschyssen ammen au e bitz:

Am Morge frieh scho uff dr Woog,
Stellt sich aim die groossi Froog:
Z vyll Kilos syyge schynts nimm Mode?
Drum ai Bai druff, und ains an Boode…

Hesch Dräänesegg vom viele Dringge,
Duesch se aifach iiberschmingge.
Duet au d Schminggi nimm rächt sitze,
Denn gosch halt no go Botox spritze…

Scho d Schieler sinn hytt ganz gerisse:
Dien nimme nur mit Spigge bschysse.
Die mit em Epfel syyge dschuld:
Me bschysst per iPhone underem Pult.

Wenn fir d Pargguhr d Stitz nit länge,
Duesch halt e Rubel iine zwänge.
Wottsch in dr Blaue Zoone blyybe,
Verstellsch halt d Zyt an dyner Schyybe.

Auto faare isch nimm glatt,
Gosch besser mit em Dram in d Stadt.
Und zem denn no s Billjee spaare,
Kasch jo au grad schwarz go faare.

Nimmsch dr Achter bis uff Weil,
Yykaufe deerte isch soo gail!
E bitzli Kitzel muess au sy:
Drum schmugglisch d Waar am Zoll verbyy…

Mit Kolleege denn am Oobe
Dringgsch dr Wy vo dääne Schwoobe.
Bim Jasse speeter hesch vyyl Schwein:
Ass de bschyssisch merggt e kain…

In däm Kueche am Drey Keenig
Hets nummen aine dinn – he, zwai zweenig.
Drumm hämmer amme, dass es fäggt,
Haimlig no zwai iine gstäggt…

Woorschynts wämmer s gar nit misse,
Mir leen is au gärn sälber bschysse:

Natura Beef, dass s numme waisch,
Isch maischtens gar kai Bioflaisch.
Und s Krokodil uff em La Coste-Hemmli
Isch Ettiketteschwindel nämmli.

Bringsch di Gäld zem Dieter B.,
Denn hesch es woorschynts s letscht Mool gsee:
Dä zoggt di ab, denn grieggsch Probleem:
„Schneeball“, glaub, haisst das Syschteem…

Au die maischte Schwyzer Bangge
Dien an Greessewaansinn grangge.
Si gänn sich alli groossi Mieh
Fir d Kundschaft Styyre z hinderzieh…

Um di Golf (dä mit zwai Liter)
Stoots verdeggel zimmlig schytter:
Die wurde schynts, das git schwäär z Bisse,
D Lyt mit dr Abgaassoftware bschysse.

E Basler Ex-Regierigsroot
Het gnau gwisst, wie Bschysse goot.
Au wenn s amänd nur Spese sinn:
E soone Bschiss liggt glyych nit dinn.

Und Lieschtel griegt, s syg in ere Gryyse,
80 Kischten iiberwiise.
Als Basler kumm mer, s isch doch woor,
Mit däm Deal zimftig bschisse vor.

Die scheenscht Nääbesach uff dääre Wält
Isch s Fuessballspiel (und dängg nit s Gäld).
Luegsch am Färnseh d WM aa,
Ganz wyt ewägg in Afrika,
Do Brasil schutte si denn au.
Worum? Das waiss me nit so gnau.
S näggscht Mool denne bi de Russe,
Und zletscht no in dr Wieschti usse,
Derbyy muesch wisse: De griegsch nyt gschänggt!
(Ein Schelm, wer Schlächtes dabei dänggt…)

So leen mir uns en X vormache,
Derbyy gits do derbyy nyt z lache.
Vo Oscht nooch Wescht, vo Süd bis Noorde:
Bschyssen isch e Volkssport woorde.

Lueg emoll unseri Lampen aa.
Denn seesch gly, wie me bschysse kaa.
Die Lampen isch, das isch verruggt,
Nit gmoolt, he nai, si isch druggt!

Au bim Zeedeldichte hämmer bschisse.
– De kasch en nooch em Lääse denn verrysse –
Dä isch, do gwinnsch e jeedi Wett,
Schlicht e Plagiat uss em Internet…

Dr Schlussvärs isch wie alli Joor
Nit bschisse, sondern aifach woor:

Magier git s, Illusionischte,
Wo d Lyt mit Driggli iiberlischte.
Leen Zyyg verschwinde, aifach herrlig.
Und e jeede waiss, die bschyssen eerlig…

Vom Määntig znacht, em 15. Hornig, bis am Mittwuch demoorge, em 17. Hornig, kasch di uff em Minschterhiigel vo de Laddäärne optisch bschysse losse. Gnau zer glyyche Zyt findet au dr Waagen- und Reggwisyte-Bschiss bi dr Kasäärne statt.

P.S.
Wenn de mee wottsch erfaare iiber uns Bschysser, denn lueg emool bi uns iinen under www.baloinese75.ch.

2015 Sujet: S Debakel vo Selfie

S Debakel vo Selfie“
oder:
„S Debaggel vom Selfie“ (korr. vom Comité)

Selfies sinn jo nit so ney:
Mir dängge doo an Dorian Gray.
Und an „Spieglein Spieglein an der Wand,
Wäär isch die Scheenscht im ganze Land?“

E Maitli uff em Guetknächt-Brunne
Drääit sich mit eme Spiegel umme.
Hitt käämi deert, me ka s fascht aane,
E Smartphone statt em Spiegel aane.

E Sälbschtporträt, das isch e „Selfie“.
Und wenn de bsoffe bisch haisst s „Drelfie“.
E ganz wiescht Selfie haisst schynts „Nudie.“
Deert zaigt men allne Lyt si Fudi…

Ebb z Basel, z Baade, ebb bim Bund,
Iiberall goot s aifach rund. Iiberall goot s kunterbunt.
Me gnippst sich self as „Nackedei“
Und schiggt das denn dr Kolleegin hai.

Dr Selfieman mit Namme Müller
Geri maint, daas sygg e Knüller.
Är het – e Root kunnt doo vergääbe –
Dr greeschti Saich abgloo im Lääbe.

Scho s letscht Joor hämmer driiber brichtet
Wie me mit Selfies Jobs vernichtet.
Falls de daas nimm wisse settisch,
Bisch in gueter Gsellschaft – wettisch?1)

1) Mer hänn das brichtet – jä, s isch woor –
In unserem Zeedel s vorder Joor!

Jä sogaar in Hollywood
Pouschte si sich fudiblutt.
Dernoode dien si driiber motze.
So vyyl Dummhait isch zem … Dervooseggle.2)

2) Bevoor s Comité kunnt mit ere Korrektur –
So wyt simmer scho mit Sälbschtzensuur!

Bi Prominänz im Allgemaine:
E Papparazzo bruucht s e kaine.
Fir die git s gar nyt mee zem Lache,
Well d Promis sälber Selfies mache!

Drifft me dr Breel aa uff dr Strooss,
Goot scho s Gerangel richtig los:
Das isch jo wirgglig soone Siesse,
S muess jeedi grad e Selfie schiesse!

Denn git s au so Schopfmakake,
Wo de Lyt iir Smartphone pagge
Und sich denn au dien sälber linse –
Ab dääne Selfies muess me grinse!

So Selfies syygen insgesamt
No gfäärlig, warnt is s Xundhaitsamt.
Will: d Kopflyys pagge s grad bim Schopf
Und wäggsle gärn vo Kopf ze Kopf…

Vom Bundesroot git s all Joor amme
E Gruppefotteli mit Dame.
Ab näggschtem Joor – hänn mir erfaare –
Git s nur no Grelfies3) – so kennt me spaare!

3) E „Grelfie“ isch dängg e Gruppe-Selfie!

Schynts findes sogaar d Muslim glatt:
E Selfie uff em Ararat!
In Mekka unde goots denn wytter.
Drotz Koran: lutt däm syg s schytter!

Sinn dini Ärm e bitzli z kurz,
Denn git s jo jetz dr neyschti Furz:
Stäggsch di Phone an e Stägge dra –
Und scho kasch au e Grelfie ha!

Und in dr letscht Museumsnacht
Hänn si Selfies „Deluxe“ gmacht!
Mir froogen is, was hätt das selle?
Das gheert doch nit zem Kulturelle!

Däm Ganze sait me Selfieness.
Machsch mit, kunnsch sälber gly in Stress.
Drum leen mer s lieber bliebe Drum leen mr s jete (Chatte?) lieber bliibe
Und dien dä Zeedel fertig schriebe.

Per Saldo bringe d Selfies nyt
Und schaade numme no de Lyt.
Me reedet kuum mee mitenand,
Het lieber s Smartphone schnäll zer Hand…

Mir derfir dien jubiliere,
Noo 40 Joor uns sälber fiire.
– Wie het s Orakel gsait vo Delphi?
E Debakel wird daas mit däm Selfie!

D Wooret isch halt grauehaft
Und unsere Zuug soo pfauehaft.
D Frau Fasnacht herself duet dirigiere,
Fir is in Fasnachtshimmel z(sel)fiere.

Doch wie me s Blatt au wändet,
Dä Zeedel im Selfiasko ändet:
Drum verdufte mir jetz glyy:
E Jubelselfie muess scho si!

Vom Määntig znacht, em 23. Hornig, bis am Mittwuch demoorge, em 25. Hornig, kasch uff em Minschterhiigel Selfies vo dir und de scheenschte Ladäärne gnippse. Gnau zer glyyche Zyt findet au d Waagen- und Reggwisyten-Usselfig bi dr Kasäärne statt.

P.S.
Wenn de mee wottsch erfaare iiber unseri Selfiemade-Glygge, denn lueg emool bi uns iinen under www.baloinese75.ch. Do derfir muesch di halt yourself yylogge. Losst di aifach nit abselfiere.

2014 Sujet: Dr Drämmligrieg.

S Baselbieterlied vom Drämmli nämmli:

 

Vo Rodersdorf bis Rieche,
Vo Dornach bis an Rhy,
Do faare grieni Drämmli,
Au gääli hets derby.
Die Drämmli sinn so frindlig,
Me macht e grooss Tamtam.
Drum hänn mir au kai Bahn so lieb
Wie unsers griene Dramm.
Drum hei mir au kai Bahn so lieb
Wie euses gääle Dramm.

Fir d Treui stoot d Faarb Blau,
(Das nimmt me aber nit so gnau.)
Mir froogen is uff alli Fäll:
Was bedytte Grien und Gääl?

Bi Grien, jä doo, do kasch no hoffe,
S sygg noonig wirgglig alles gloffe.
Aber d Faarb vom Niid isch halt au s Grien.
– Wenn grieni Drämmler niidisch dien…

Bim gääle Drämmli herrscht no Zucht
Und Oornig, und kai Yyfersucht.
Und ass me s au no laike ka,
Hets ringsum rooti Straiffe dra.

Es git wäge däm vyyl Drämmligschichte,
(Uff die vom -minu muesch verzichte…)
Aber sicher isch vom Laimedaal
Dr Wääg zem Bahnhof halt e Qual.

Drum fallt aim d Nummere Sibzää yy:
(Dasch friener s blaue Bäänli gsi.)
Das sott jetz d Lyt dr Stich uff faare –
Vom Laimedaal an Bahnhoof kaare.

Kuum stoot das uff dr Zyttigssytte,
Feen die Drämmler afoo stritte.
D BLT will mit Gääl duruff –
Und d BVB macht sofort Buff!

„Soo dyyri Investitioone
Miesse sich fir d Basler loone.
Und iiberhaupt syggs unverfroore:
S gieng Personaal esoo verloore!“

Die Gääle maine, das sygg glooge.
Dermit wurd s Bubblikum betrooge.
Und iiberhaupt, was die do welle,
Kasch nur em Fäärimaa verzelle.

So schleen si sich denn d Grinder yy
Und mergge nit emoll derby,
Bim Verbraite vo so Zoote,
Ass si voll ins Offside groote.

Uss Kupfer isch dr Kirchdurmspitz –
Au isch er gääl und grien e bitz.
S isch wie wenn er driiber lacht
Iiber die saubleed Margretheschlacht.

Dä Drämmligrieg isch halt wie Schach:
Dr Keenig schloot zerscht d Buure flach,
Und d Dame sticht denn d Ressli uuse.
Nur dr Wessels duet no pfuuse.

E soon e Schachspiel isch jo glatt:
Am Schluss vo däm sinn alli matt.
Irgendain verliert d Geduld,
Denn isch dr Schwarzi Peter tschuld!

Gly druff aabe isch es z spoot
Fir dr BVB-Verwaltigsroot.
Fir Eerligkait hänn die kai Gschpyyr –
Und Guede Rath isch wirgglig dyyr.

Ain nooch em andere fliegt jetz uuse.
Dr Grund derfir isch dails zem Gruuse.
Dr BLT spielt das in d Händ,
Die hänn die besseren Argumänt.

E Flexity-Drämmli oder e Tango?
Bis ains kunnt, kaa s eh no lang go:
„Drämmli, Drämmli, Drämmli, Drämmli.
Jä Drämmli, uf di warti nämmli…“

Uff d Stich-Verbindig muesch au warte,
Si wänn e Referändum starte:
Die ainte wänn e Tunnel baue,
Die and’re s Gäld nit so versaue.

S kääm schynts vor bim viele Liege,
Ass sich d Schyyne dien verbiege.
Jetz sott das Dramm – es isch zem Lache –
Dur s Gundeli en Umwääg mache.

Mir dien – statt im e Drämmli sitze
Oder bim Uffelaufe schwitze –
Halt mit em Flyer uffe flitze.
(Und d Schnäggli deerten au grad schitze..)

Drey Dääg speeter fallt dr Stich-Entschaid:

Und wie vermuetet ka me see:
Dr Drämmligrieg gwinnt d BLT!
S ney Stich-Wort fir die gääle Drämmli
Haisst jetz „Gääl, blyb suuber“ – nämmli…

Wenn uff e Minschterhiigel wottsch, muesch au e Stich uffelaufe. Derfir kasch denn deerte in aller Rue gääli und grieni Brachtstigg go bschaue (woorschynts au blaui), und zwoor vom Määntig znacht, em 10. Merze 2014, bis am Mittwuch demoorge, em 12. Merze. Gnau zer glyyche Zyt findet au d Waagen- und Reggwisyten-Usstellig bi dr Kasäärne statt. Deert faart wirgglig s Drämmli aane.

P.S.
Wenn de mee Stichhaltigs wottsch erfaare iiber unseri Glygge, denn lueg emool bi uns iine under www.baloinese75.ch. Do derfir muesch nit e Stich duruff.

 

Bâloinese 75
4056 Basel

Postadresse
c/o Marcel Trachsel, Habsmattweg 1, 4153 Reinach

Kontakt
Felix Glaser catglaser@vtxmail.ch
Webmaster
Nicole Trachsel nicole.trachsel@int-ext.com

Bankverbindung
PostFinance
Ktn.-Nr. 40-29310-2