Aggtuell

Sujet: 80 Joor LSD – ganz Basel im Delirium

​Gsunge:
«Picture yourself in a boat on a river
With tangerine trees and marmalade skies.
Somebody calls you, you answer quite slowly,
A girl with kaleidoscope eyes.»

D Lucy bsetzt mit Diamante,
Wo vom Himmel luege duet.
Das isch ains vo de bikannte
Beatleslieder – aifach guet!

Scho goot s los mit Spekuliere:
Lucy, Sky und Diamant?
Me kennt s mit «L-S-D» probiere?
Hejoo, das deent ganz intressant…

D Voorgschicht

D Sandoz suecht e Wundermittel,
Wo dr Kraislauf stimuliert.
Dr Hofmaa schittlet s us sim Kittel
Und het s grad sälber ussprobiert.

Denn faart er haime mit sim Velo
Und dänggt derby, jä spinn i jetzt?
Är fyylt sich aifach picobello. –
Scho het s en uff e Ranze gschletzt…

Si Hirni liggt ganz lyycht dernääbe:
Die Faarbebracht, das git s jo nit!
Und d Baim feen ringsum aafoo lääbe. –
Das LSD isch voll dr Hit!

Kuum git s dä Wirggstoff in dr Szeene,
Wird äär missbruucht als Droogestoff
Vo Hippies, wo sich zue leen dreene.
Und in dr Wisseschaft git s Zoff!

Und wäägen all so Vollidiotte,
Wo LSD als Usflucht seen,
Wird iiberall dä Stoff verbotte:
«Missbruuch» isch halt niene scheen…

D Gschicht(li)

Erscht hitte git s bi uns s Besträbe,
Ass men LSD als Chance seet.
Me kennt dermit bitz besser lääbe.
Es hilft jo schynts bi alle Neet.

Zem Bischbiil wirggt s bi Depressioone.
(Das hänn halt hitt e Huffe Lyt.)
Schynts länge Micro-Portioone.
(Bim Elon Musk nutzt das glaub nyt…)

D Realidäät bi uns isch amme
Ender fascht e Horrortrip.
Mir nenne drum das Kind bim Namme
Und gänn Eych do baar Gratistipp:

In Basel ka me kuum me läbe,
In dr Stadt wird baut und baut.
Iiberall het s grossi Grääbe –,
D City isch komplett versaut.

Me ka bi uns Film fascht nimm luege,
D Kino hänn schynts kuum rentiert.
D Margrethebrugg isch uss de Fuege.
Au s Drämmli isch lyycht antiquiert…

Ass d Schieler/e nimm kenne lääse,
Kasch us dr Pisastudie nää.
Bivoor die Hirni ganz verwääse,
Kennt me ‘ne doch Lucy gää?

Demos hämmer bi uns dääglig.
Fir was denn gnau, das waiss me nit.
So Machtkämpf änden amme glääglig:
Well s Gummischroot statt Friide git.

Fir Verschwöörigsfans und Klimaglääber
Hänn mir e Leesigswääg baraad:
Mir schigge ‘ne dr Eric Wääber.
Dä haltet au nit vyyl vom Staat…

Und hesch wie mir «Schwarzwiss» im Wappe,
Denn bruuchts doch garantiert mee «Bunt».
Mit LSD kennt s, glaub i, glabbe,
Well s Wappe, glaub i, Farb bikunnt.

Rotgrien syg d Regierig z Basel,
Und trotzdäm kasch nur Schwarz me gsee.
Ebb bi all däm vylle Gfaasel
Me hälfe kennt mit LSD?

In dr Kunscht hilft s au, in Maasse,
E mängge wird gar kreativ.
Und hesch e deschtruggtivi Phase,
Denn wirggt s emänd au konschtruggtiv.

Ganz wichtig isch au d Pharmazie:
Dangg iire blybbt me zimmlig gsund.
Kai LSD gääb s ooni sii.
Und ooni Valium giengs s nit rund …

Und fir die näggschti Katastrophe
Bikunnt me Jodtablette gschiggt.
Bi all däm Mischt kasch nimm rächt schloofe:
Scho wäär – dangg LSD – dr Kessel gfliggt!

D Noochgschicht, oder: e ganz nit unwichtigen Epilog

Mir Bâloineese, dasch nit glooge,
Hänn d Fasnacht fir uns ganz per se.
Mir bruuche drum au kaini Drooge:
Fir uns isch d Fasnacht s LSD!

 

Vom Mäntig znacht, em 19. Hoornig, bis am Mittwuch demoorge, em 21. Hoornig, kasch uff em Minschterhiigel en optische Faarbetrip erlääbe. Zer glyyche Zyt erläbbsch bi dr Kasäärne hoffedlig kai Horrortrip.

P.S.
Wenn de di Bewusstsyy wottsch erwyttere, denn kasch das uff www.baloinese75.ch.

WasWieWennWoWarum 2024

Was Wie Wenn Wo

Unsere Ladäärne im Fasnachtsquerschnitt von Telebasel

Für den Fasnachtsquerschnitt 2024 Teil 2 hat Telebasel ein längeres Interview mit Andreas Hofmann, Sohn von Albert Hofmann, über unser Sujet und unsere Ladäärne geführt (zwischen 13:30 und 17:00). Dabei erscheint unser Prunkstück im besten Licht.

Bâloinese 75

Postadresse
c/o Marcel Trachsel, Habsmattweg 1, 4153 Reinach

Kontakt
Marcel Trachsel, marcel.trachsel@int-ext.com

Bankverbindung
Postfinance, Kto.-Nr. 40-29310-2

Pin It on Pinterest

Share This